Shkup, 17 tetor – Në orën 17:30 u mbyllën të gjitha vendvotimet në të cilat qytetarët e Republikës së Maqedonisë së Veriut sot votuan në zgjedhjet lokale.
Edhe pse ishte parashikuar vendvotimet të mbyllen në orën 19:00, procesi zgjedhor vazhdoi gjysmë ore derisa votuan qytetarët të cilët ishin para objekteve për votim.
Udhëheqësitë partiake janë në shtabet e tyre, ku i presin rezultatet e votimit, të cilat priten të publikohen rreth mesnatës.
Në zgjedhjet e sotme lokale të drejtë vote kishin 1 824 864 qytetarë, të cilët votuan në 3.480 vendvotime.
Qytetarët votën e tyre kanë mundur ta japin gjithsej për 10 831 kandidatë prej të cilëve 233 për kryetarë të komunave, ndërsa të tjerët për këshilltarë, në 91 lista të dorëzuara nga grupi i votuesve gjegjësisht të pavarur dhe 31 lista nga partitë politike dhe koalicionet.
Për herë të parë këtë vit votuesit u identifikuan me pajisje për identifikim biometrik përmes shenjave të gishtërinjve. Këto pajisje i përmbajnë vetëm të dhënat personale të votuesve nga Lista zgjedhore në vendvotim.
Rezultatet e rrethit të parë zgjedhor priten rreth mesnatës. Në rrethin e parë të votimit për kryetar komune zgjidhet ai kandidat që ka fituar shumicë të votave nga votuesit të cilët kanë votuar, nëse në zgjedhje kanë dalur një e treta e numrit të tërësishëm të votuesve të regjistruar në certifikatën e Listës së votimit për komunën përkatëse. Nëse në rrethin e parë të votimit për zgjedhje të kryetarit të komunës, gjegjësisht qytetit të Shkupit, nuk dalin një e treta e numrit të përgjithshëm të votuesve të regjistruar në certifikatën e Listës së votimit për komunën përkatëse, gjegjësisht Qyteti i Shkupit, përsëritet gjithë procesi zgjedhor.
Nëse në rrethin e parë asnjë kandidat për kryetar komune nuk e ka fituar shumicën e nevojshme të votave në pajtim me nenin 132 paragrafi 1 i Kodit Zgjedhor, në rrethin e dytë votohet për dy kandidatët të cilët në rrethin e parë kanë fituar më së shumti vota. Rrethi i dytë i votimit mbahet në afat prej 14 ditëve nga dita e përfundimit të rrethit të parë të votimit. Në rrethin e dytë të votimit për kryetarë të komunave zgjidhet kandidati i cili ka fituar numër më të madh të votave.
Nëse edhe pas rrethit të dytë për ç’farëdo lloj arsye nuk bëhet zgjedhja e kryetarit të komunës, komisioni zgjedhor në afat prej 15 ditësh pas përfundimit të zgjedhjeve e njofton Qeverinë.
Këshilltarët zgjedhen në rrethin e parë të zgjedhjeve dhe megjithatë përdoret modeli proporcional, me ç’rast ndarja e mandateve bëhet sipas metodës D’hondt.
Zgjedhjet lokale i monitoruan 1045 vëzhgues prej të cilëve 714 vendorë. Misioni i OSBE/ODIHR ka akredituar 217 vëzhgues.
Për shkak të pandemisë me Kovid-19, Zgjedhjet lokale zbatohen me respektimin e masave të përgjithshme për mbrojtje nga Kovid-19.
