Shkup, 7 shtator – Vendim i ri me të cilin definohet dhe rregullohet shfrytëzimi i veturave zyrtare në pronë të shtetit, ishte miratuar në mbledhjen e sotme të Qeverisë, me iniciativë të zëvendëskryetarit të Qeverisë për Luftë Kundër Korrupsionit, Resurse Njerëzore dhe Zhvillim të Qëndrueshëm, Lupço Nikollovski.
Vendimi, siç informuan nga kabineti i Nikollovskit, është bërë ashtu që i eliminon keqpërdorimet potenciale të veturave zyrtare, gjegjësisht shfrytëzimin e resurseve publike për qëllime private.
“Me dispozitat e reja, secili shfrytëzim i veturave zyrtare duhet të aprovohet, arsyetohet, me qëllim dhe në mënyrë racionale dhe në përputhje me vizionin, misionin, qëllimet dhe fushëveprimin e organit shtetëror sipas kompetencave të tij”, tha Nikollovski.
Sistemi i ri për ndjekjen e shfrytëzimit të veturave zyrtare dhe mënyra se si do të sigurojnë lejet për shfrytëzim, thuhet në kumtesën e kabinetit të Nikollovskit, mundëson detektim të lehtë të parregullsive dhe sanksionimin e tyre.
Kjo është edhe një masë e Qeverisë në drejtim të shfrytëzimit racional të pajisjeve zyrtare dhe mjeteve buxhetore.
“Në periudhën e kaluar, u miratua dhe tashmë vendimi po aplikohet, i cili kufizon shpenzimet e shërbimeve hotelierike për takimet e punës nga bartësit e posteve publike, dhe ndryshimet në Ligjin për Ndërmarrjet Publike kufizojnë shpërblimin e anëtarëve të bordeve udhëheqëse dhe mbikëqyrëse dhe zvogëlohet numri i anëtarëve të bordeve drejtuese dhe mbikëqyrëse”, thuhet në kumtesën e kabinetit të Nikollovskit.