Shkup, 26 korrik – Ligji për shtetësi kaloi procedurat në Komisionin për çështje evropiane, ku janë shqyrtuar amendamentet e dorëzuara mbi propozim tekstin. Pritet që ligji të shkojë për procedurë të mëtutjeshme në Komisionin juridiko-ligjvënës, e më pas të vendoset për miratim në seance plenare. Kryetari i Komisionit për çështje evropiane, Arbër Ademi, beson se ligji do të miratohet së shpejti.
“Sot përfundojmë me punën e komisionit në mënyrë që pika të jetë e pjekur për vendosje në seancë plenare. Uroj mos të ketë “filibastering”, mos të ketë zvarritje të procedurave, mos të ketë qasje për të bërë obstruksione që të zvarritet miratimi i këtij propozim ligjit edhe pse besoj se një gjë e tillë është minimizuar dhe së shpejti do ta kemi të miratuar këtë propozim-ligj”, tha Ademi.
