Policia e Kosovës ka arrestuar pesë persona të dyshuar për plagosjen e dy personave gjatë ditës së sotme në Klinë.
Të arrestuarit dyshohen për veprën penale “Vrasje në Tentativë” dhe “ pjesëmarrje në rrahje”.
“Më datë 18 maj 2022 rreth orës 13:40, Policia është informuar për të shtëna me armë zjarri në rrugën “Abedin Rexha” në Klinë. Policia menjëherë ka dalë në vendngjarje, aty është informuar se disa persona fillimisht janë rrahur mes veti, dhe si pasojë e rrahjes dy persona janë plagosur nga arma e zjarrit”, bënë të ditur policia.
Të plagosurit, sipas policisë janë dërguar me autoambulancë në Spitalin Rajonal në Pejë, për trajtim të mëtutjeshëm mjekësor.
