Komiteti Ekzekutiv i FFK-së sot mbajti mbledhjen e vet të radhës nën drejtimin e presidentit Agim Ademi, ku diskutoi shumë çështje me rëndësi për futbollin e Kosovës.
Risia më e madhe është ndryshimi i trajnerit tek Përfaqësuesja U21 e Kosovës.
Pas largimit të Michael Nees, përzgjedhës i përkohëshëm ishte Albert Bunjaku, derisa tani e tutje U21-shat kanë një trajner të ri.
Komiteti Ekzekutiv ka marrë vendim që postin e trajnerit te U21 t’ia besoj trajnerit të mirënjohur kosovar, Afrim Tovërlanit.
“KE shqyrtoi ecurinë e ekipeve kombëtare dhe në këtë drejtim mori vendim që për përzgjedhës të Kombëtares U21 të emërojë futbollistin e spikatur dhe trajnerin më të trofeshëm në futbollin e Kosovës, Afrim Tovërlani. Po ashtu KE mori vendim që të bëhet riorganizimi i trajnerëve për ekipet kombëtare të femrave për të gjitha grup moshat”, thuhet në njoftimin e FFK-së.
Tovërlani ka drejtuar skuadra të njohura në vendin tonë si Prishtinën, Feronikelin, Trepçën ’89 e Ferizajn. /Gazeta Olle/
