Shkup, 6 dhjetor – Mbështetje e tërësishme e SHBA-së për gjetjen e zgjidhjeve të përbashkëta për çështje dypalëshe mes Republikës së Maqedonisë së Veriut dhe Republikës së Bullgarisë u theksua në takimin e sotshëm të kryetarit të Qeverisë së Republikës së Maqedonisë së Veriut Zoran Zaev me zëvendësndihmësin e sekretarit shtetëror të Shteteve të Bashkuara të Amerikës për çështje evropiane dhe euro-aziatike dhe përfaqësues special për Ballkanin Perëndimor, Garbiell Eskobar, i cili është në vizitë të parë pune në vendin tonë.
Partneriteti mes SHBA-së dhe Maqedonisë së Veriut dhe anëtarësimi i vendit në BE janë shumë të rëndësishme për Shkupin dhe Uashingtonin, thonë nga shërbimi qeveritar për shtyp në kumtesën për takimin e Zaevit me Eskobar.
Zaev në takim e njoftoi mysafirin me gjendjen politike aktuale në vend gjatë së cilës është siguruar vazhdimësi stabile e përcaktimeve strategjike politike për mbështetjen e proceseve për pjesëmarrje aktive të Maqedonisë së Veriut në NATO, për përshpejtimin e integrimit të Maqedonisë së Veriut në BE, për ballafaqimin me pandeminë, për rritje ekonomike dhe veçanërisht për çështjen aktuale për përgjigje kompetente dhe efikase të krizës energjetike.
“Zëvendësndihmësi i sekretarit shtetëror të Shteteve të Bashkuara të Amerikës për çështje evropiane dhe euro-aziatike dhe përfaqësues special për Ballkanin Perëndimor, Garbiell Eskobar, i cili në takim ishte i shoqëruar nga ambasadorja Kejt Mari Bërnz, theksoi se vizita e tij në vend ka për qëllim të theksojë mbështetjen e SHBA-ve, pikërisht për këto çështje, si dhe për qasjen partnere që Republika e Maqedonisë së Veriut e tregon me pranimin e qytetarëve nga Afganistani dhe për rolin aktiv për intensifikim thelbësor të bashkëpunimit rajonal përmes nismës ‘Ballkani i Hapur'”, thuhet në kumtesë.
Në takim, informojnë nga Qeveria, u theksua mbështetja e tërësishme e SHBA-së për gjetjen e zgjidhjeve të përbashkëta për çështje dypalëshe mes Republikës së Maqedonisë së Veriut dhe Republikës së Bullgarisë për shkak të faktit që ardhmëria e Maqedonisë së Veriut është në BE si temë jashtëzakonisht e rëndësishme për SHBA-të, së bashku me pjesëmarrjen e përbashkët strategjike në NATO dhe me partneritetin dypalësh mes dy vendeve që është në zhvillim të vazhdueshëm.
