Siria deklaroi se mbështet vendimin e presidentit rus, Vladimir Putin për të njohur dy rajonet separatiste, Donjeck dhe Luhansk, si të pavarura.
“Siria mbështet vendimin e presidentit Putin për të njohur republikat Luhansk dhe Donjeck dhe do të bashkëpunojë me to”, u shpreh ministri i Jashtëm sirian, Faisal Mikdad.
Mihdad i ka bërë këto deklarata në Forumin Valdai në Moskë, më 22 shkurt.
“Ajo çfarë Perëndimi po bën kundër Rusisë sot, është e ngjashme me atë që ka bërë kundër Sirisë gjatë luftës terroriste”, shtoi ai.
Rusia është aleate e presidentit sirian, Bashar al-Assad që prej shpërthimit të luftës në Siri më 2011.
Mikdad tha se SHBA dhe Perëndimi “vazhdojnë të mbështesin terrorizmin në Siri, i cili përbën kërcënim për Lindjen e Mesme dhe botën”.
Më 21 shkurt presidenti rus Putin deklaroi se ai do të njohë kërkesën e liderëve separatistë për pavarësim e të dyja rajoneve që ata kontrollojnë në Ukrainë.
Ai po ashtu tha se do të dërgojë trupa ruse për të shërbyer si “paqeruajtës”, deklaratë të cilën Perëndimi dhe SHBA e kanë konsideruar si “të pakuptimtë”.
