Shkup, 3 mars – Ka përfunduar gjykimi i autorëve të akuzuar të grupit “Javna soba” në “Telegram” ku shpërndahej përmbajtje seksiste, shkruan Alsat. Në fjalën e tij përmbyllëse, prokurori Vlladimir Millosheski deklaroi se në mënyrë flagrante janë shkelur të drejtat e njeriut, veçanërisht e drejta e fëmijës me shpërndarjen e pornografisë fëmijërore.
“Të dy kanë lejuar gjithashtu, që një material i tillë të shpërndahet dhe të mos fshihet, e as ta ndalojnë atë në anëtarësimin e mëtejshëm në grupin e personit, që e ka shpërndarë këtë material me të tjerët”, tha Vlladimir Millosheski, prokuror.
Avokati i të akuzuarit të parë Darko Kostovskit, Petro Janura, para gjykatës tha se ai në fakt ka qenë hero sepse e ka fshirë grupin “Javna soba” nga “Telegrami”. Kërkoi që klienti i tij të lirohet, sepse ishte i ndershëm dhe i sinqertë.
“Këta janë të rinj të familjeve tipike maqedonase, mesatarë, të mësuar të mos vjedhin, të mos gënjejnë, të bashkëpunojnë me policinë, të bëjnë vepra të mira sociale”, u shpreh Petro Janura, avokat i Darko Kostovskit.
Avokatja e të akuzuarit të dytë Mihail Panevski, Ivanka Jakimovska në fjalën e saj përmbyllëse tha se asnjë nga organet e hetuesisë nuk ka marrë vesh se kush në grupin “Javna soba” ka shpërndarë filmime me pornografi fëmijërore dhe për këtë Panevski nuk ka kryer vepër penale.
“Fillimi dhe fundi i veprës së supozuar penale- prodhim dhe shpërndarje të pornografisë fëmijërore është momenti kur është vendosur përmbajtje e inkriminuar nga anëtari i grupit sepse pikërisht ai, personi i panjohur e ka bërë të kapshme pornografinë fëmijërorë. Çdo gjë tjetër, çdo veprim tjetër shtesë pas pasojës që qëndron në përshkrimin ligjor të veprës penale nga aspekti i teorisë juridike – penale nuk qëndron dhe s’mund të jetë vepër penale”, theksoi Ivanka Jakimovska- avokate e Mihaill Panevskit.
Aktvendimi për ta do të publikohet më 11 mars. Në grupin “Javna Soba” në Telegram kanë pasur më shumë se 600 shfrytëzues ku janë këmbyer mijëra fotografi eksplicite./Alsat.mk
