Shkup, 14 nëntor – Në kuadër të Seancës së Përbashkët të Qeverisë së Republikës së Maqedonisë së Veriut dhe asaj të Republikës së Shqipërisë, e cila e mbajt në Shkup, Ministri i Punëve të Jashtme i Republikës së Maqedonisë së Veriut, Bujar Osmani dhe Ministrja për Evropën dhe Punët e Jashtme të Republikës së Shqipërisë, Olta Xhaçka nënshkruan memorandume bashkëpunimi ndërmjet dy instucioneve.
Me Memorandumin e Bashkëpunimit në fushën e Edukimit Diplomatik, hapen mundësi të reja për organizimin e trajnimeve dhe ligjëratave të folësve dhe diplomatëve relevantë, e veçanërisht në kontekst të negociatave të filluara për anëtarësimin e të dy vendeve në Bashkimin Evropian.
Me Memorandumin e dytë, do të mundësohet shkëmbimi i përvojave në fushën e digjitalizimit të shërbimeve konsullore. Ky projekt në Shqipëri funksionon prej disa vitesh, ndërsa Ministria e Punëve të Jashtme e Republikës së Maqedonisë së Veriut është në fazën finale të vënies së të njëjtit në funksion, e me këtë në mënyrë drastike thjeshtohen dhe shkurtohen proceurat për ofrimin e shërbimeve konsullore.
Mes tjerash, Osmani dhe Xhaçka iu referuan edhe dinamikës së marrëdhënieve bilaterale, bashkëpunimit rajonal dhe perspektivës eurointegruese të të dyja vendeve.
