Presidenti izraelit, Isak Hercog sot zyrtarisht ia besoi mandatin për formimin e qeverisë së re izraelite të 37-të liderit të konservatores Likud, kryeministrit më jetëgjatë në historinë e Izraelit, Benjamin Netanjahu.
Likud i Netanjahut, bashkë me aleatët e tij – partitë hebraike ultra të djathtët dhe ultraortodoksët, në zgjedhjet e 1 nëntorit fituan shumicën stabile prej 64 mandateve nga gjithsej 120 në parlamentin izraelit.
Fitorja në zgjedhje i siguroi Netanjahut që të kthehet në pushtet pas 19 muajve në opozitë.
“Benjamin Netanjahu kam vendosur tu jap mandatin për të formuar qeverinë”, tha Hercog në rezidencën presidenciale në Jerusalem, duke vlerësuar se nuk ishte vendim i lehtë dhe se nuk e ka harruar faktin që Netanjahu gjykohet për korrupsion.
Netanjahu sot për të tetën herë e mori mandatin që të formojë qeveri, tashmë pesë herë ishte kryeministër, ndërsa nuk pati sukses tri herë, informojnë mediat izraelite.
Ai paralajmëroi se do të jetë kryeministër i “të gjithë qytetarëve izraelitë, pa përjashtime”.
“Janë të shumtë ata që i mirëpresin rezultatet e zgjedhjeve, por ka edhe nga ata që thonë gjëra të pahijshme dhe trembin publikun, nuk është hera e parë që thuhen gjëra të tilla”, tha Netanjahu.
Ai përkujtoi se kjo i ka ndodhur liderit të parë të Likuid, Menahem Begin, por edhe atij dhe se nuk ka qenë e vërtetë as atëherë, e as tani.
“Kam ndërmend të jem kryeministër i të gjithëve – atyre që më kanë zgjedhur dhe atyre që nuk më kanë zgjedhur. Ky është reflektim i asaj që unë besoj dhe i udhëheq veprimet e mia”, shtoi 73-vjeçari Netanjahu.
Pas periudhës së stagnimit politik pa precedent dhe pesë zgjedhjeve për më pak se katër vjet, Netanjahu kthehet në funksionin e kryeministrit për të gjashtën herë.
Netanjahu ishte kryeministër më gjatë në historinë e Izraelit nga viti 1996 deri në vitin 1999 dhe nga viti 2009 deri në vitin 2021.
