Tetovë, 22 gusht – Pas gati tre javësh kërkim sot është gjetur trupi i pajetë i 52 vjeçarit Isa Rushiti nga fshati Tenovë, komuna e Bërvenicës.
Ndaj tij është udhëhequr hetim nga 6 gushti, pasi natën mes 4 dhe 5 gushtit, ka dalë nga shtëpia e tij dhe prej atëherë nuk është kthyer në Tenovë.
“Sot, më 22 gusht, në ora 15:00 në SPB Tetovë është raportuar se në ujërat e lumit Vardar, në afërsi të vendit Brioni dhe këndit të vjetër të futbollit, i varur në pemë është gjetur trupi i pajetë i I.R.(52) nga Tenova e Tetovës. Ekipet e Njësisë Territoriale të Zjarrfikësve Tetovë dhe SPB Tetovë kanë nxjerrë trupin e pajetë në breg pasditen e sotme. Ekipi hetimor i SPB-së Tetovë, në koordinim me prokurorin publik, ka kryer kontroll, ndërsa do të kryhet edhe autopsi”, informojnë nga SPB Tetovë.
Në kërkim kanë marrë pjesë Qendra për Menaxhimin e Krizave, Drejtoria për Mbrojtje dhe Shpëtim, MPB, Komuna e Bërvenicës, si dhe qytetarë.
