Shkup, 19 korrik – Në Kuvendin e Republikës së Maqedonisë së Veriut për sot është caktuar seanca plenare e 79-të në rend dite të së cilës janë 40 pikë.
Deputetët duhet të debatojnë për ndryshimet e Ligjit për veprimtari detektuese, të Ligjit për kontroll kufitar dhe të Ligjit për armë si edhe për ndryshimet e Ligjit për shkelje kundër rendit dhe qetësisë publike.
Në rend dite të seancës janë ndryshimet e Ligjit për akciza dhe të Ligjit për tatimin e vlerës së shtuar, të dy me procedurë urgjente. Në procedurë të shkurtuar janë shtruar edhe propozim-ndryshimet e Ligjit për shërbim gjyqësor, Ligjit për shërbimin e prokurorisë publike dhe Ligjit për zbatimin e sanksioneve.
Në mesin e pikave të rendit të ditës janë edhe ndryshimet e Ligjit për shërbim në Armatë, të Ligjit për mbrojtje shëndetësore dhe të Ligjit për noteriatin, si edhe Propozim – llogaria përfundimtare e Buxhetit të Republikës së Maqedonisë së Veriut për vitin 2021.
Në seancë janë edhe Propozim-kodi për shfuqizimin e Kodit për sjelljen etike të deputetëve në Kuvend, Propozim-ndryshimet e Ligjit për inspektimin arsimor, ndryshimet e Ligjit për familjen, si edhe më shumë raporte vjetore të institucioneve.
