Tetovë, 13 shtator – Më shumë se 50 studentë nga të gjitha 13 njësitë akademike të Universitetit të Tetovës, semestrin dimëror 2021/22 do ta ndjekin në universitete të ndryshme të Evropës në kuadër të programit Erasmus+, informuan nga institucioni i arsimit të lartë.
Me këtë rast prorektori për bashkëpunim ndërkombëtar, prof.dr. Shefik Shehu, priti në një takim përcjellës studentët e përzgjedhur.
“Universiteti ynë, pret dhe përcjell studentë dhe staf akademik, në kuadër të platformës më të suksesshme për shkëmbim në botë, atë të Erasmus+. Me një strategji të mirëfilltë të ndërkombëtarizimit, Universiteti i Tetovës, është pozicionuar fuqishëm mes institucioneve më prestigjioze evropiane të arsimit të lartë”, informuan nga Universiteti i Tetovës.
Në takim, koordinatorja e programit Erasmus + në Universitetin e Tetovës, Shpresa Ademi, i informoi studentët për çështje logjistike dhe ndau informacione të përditësuara me ta.