Ballkani mund të mbetet pa tre yjet kryesorë të skuadrës qysh në afatin kalimtar të janarit.
Kampioni në fuqi i Kosovës mori për herë të parë pjesë në arenën evropiane dhe arriti deri në grupet e Ligës së Konferencës, ku treguan paraqitje shumë të mira.
Suharekasit ishin në grup me kampionët rumun CFR Cluj, Sivasporin e Turqisë dhe Slavia Pragën e Republikës Çeke.
Por skuadra e udhëhequr nga Ilir Daja mund të mbetet pa tre yjet kryesorë të skuadrës si Meriton Korenica, Ermal Krasniqi dhe Albion Rrahmani.
Është kampioni në fuqi i Rumanisë, CFR Cluj që ka shprehur interesim për transferimin e tre futbollistëve kosovarë.
Telegrafi ka mësuar se Cluj kishte kontaktuar Ballkanin për mesfushorin Meriton Korenica që pas ndeshjes së parë, pasi 25-vjeçari pati paraqitje fantastike.
Kontaktet për Korenicën mes dy klubeve kanë qenë të vazhdueshme që nga 8 shtatori kur dy skuadrat u përballen në Prishtinë.
Ylli rahovecian ka qenë ndër lojtarët kryesorë të Ballkanit në Evropë, pasi shënoi dy gola e asistoi në një tjetër në gjashtë ndeshje të zhvilluara.
Korenica në 30 ndeshje zyrtare këtë edicion ka realizuar 10 gola e ka asistuar në dy të tjerë, teksa mbetet objektivi kryesor i Cluj në afatin kalimtar të janarit.
Burimet e Telegrafit njoftojnë se më vonë drejtuesit e klubit rumun kanë shprehur interesim edhe për dy sulmuesit tjerë të Ballkanit, Ermal Krasniqin dhe Albion Rrahmanin.
Anësori nga Malisheva, Ermal Krasniqi ka shënuar 11 gola e ka asistuar në shtatë të tjerë në 30 ndeshje zyrtare këtë edicion.
Ndërkohë sa i përket sulmuesit qendror, Albion Rrahmani ka realizuar 14 gola e ka asistuar në gjashtë të tjerë në 31 ndeshje zyrtare.
Bisedimet mes dy klubeve po vazhdojnë dhe në janar pritet që të ketë oferta zyrtare ku do të shqyrtohen nga Ballkani.
