Shkup, 14 janar – Nën sloganin “ka zgjidhje”, Ministri i Drejtësisë, Bojan Mariçiq, sot e paralajmëroi fushatën për promovimin e ndërmjetësimit si mënyrë alternative për zgjidhjen e mosmarrëveshjeve dhe ngritjen e vetëdijes së qytetarëve për përfitimet nga zbatimi i saj.
Siç theksoi Mariçiq, kjo fushatë, e cila është pjesë e Strategjisë për reformën në gjyqësor, është në interes të publikut për të afirmuar ndërmjetësimin, informimin më të mirë të qytetarëve gjatë procedurës dhe kësaj mënyre të zgjidhjes së kontesteve.
“Zgjidhja alternative e mosmarrëveshjeve përmes ndërmjetësimit është një hap i madh përpara, jo vetëm në drejtim të përshpejtimit dhe efikasitetit të zgjidhjes së mosmarrëveshjeve, por në drejtim të zgjidhjes më moderne të mosmarrëveshjeve në përgjithësi, tha ministri në konferencën e sotme për shtyp me rastin e paralajmërimit të fushatës.
Sipas tij, nga zgjidhja e mosmarrëveshjeve përmes negociatave përfitojnë jo vetëm individët, por edhe sistemi juridik dhe shoqëria në tërësi.
“Me përdorimin e ndërmjetësimit si instrument për zgjidhjen e mosmarrëveshjeve zvogëlohet numri i çështjeve gjyqësore dhe hapet hapësirë gjykatat në mënyrë edhe më efektive dhe më efikase ta kryejnë funksionin e tyre, duke pasur të njëjtin efekt si vendimet gjyqësore”, tha ai.
Pavarësisht se ndërmjetësimi është prezent në vendin tonë prej 15 vitesh, ministri tha se shumica e qytetarëve nuk e njohin natyrën e ndërmjetësimit, apo efektet pozitive të kësaj mënyre të zgjidhjes së mosmarrëveshjeve.
“Pas inercisë, ata menjëherë fillojnë procedurat gjyqësore, duke mos ditur se kjo mënyrë e zgjidhjes së mosmarrëveshjeve jashtë gjykatës është më e thjeshtë, zgjat më pak, kushton më pak, është konfidenciale dhe nuk ka efekte negative”, tha Mariçiq.
Fushata përfshin video promocionale, reklama me baner dhe ueb faqe që do të promovohet në fillim të muajit të ardhshëm, ku qytetarët mund të informohen për rrjedhën dhe procedurën e ndërmjetësimit, por edhe të zgjedhin lehtësisht ndërmjetësuesin e tyre të licencuar.
Sa i përket efekteve të deritanishme të ndërmjetësimit, Mariçiq theksoi se ai nuk është ilaç për të gjitha dobësitë në sistemin gjyqësor, por duhet pasur parasysh se 50-70 për qind e mosmarrëveshjeve mund të përfundojnë.
“Ndërmjetësuesit e licencuar, që nga viti 2021, kanë treguar regjistrimin e gati 3500 lëndëve në regjistrin e regjistrimit të procedurave të ndërmjetësimit në MD, prej të cilave 1730 kanë përfunduar me marrëveshje, tha ai.
Për zbatimin e plotë të kësaj metode efektive të zgjidhjes së mosmarrëveshjeve dhe ringjalljen e saj, siç tha ai, “duhet të përfshihen të gjithë aktorët përkatës, përfaqësues të profesionit ligjor, shoqëria civile, odat ekonomike, institucionet, gjykatat, prokurorët dhe sigurisht mediat”.
Sllave Mlladenovski, anëtar i grupit punues për përgatitjen e Ligjit për ndërmjetësim, tha se me zbatimin e Ligjit për ndërmjetësim shpreson dhe pret që Maqedonia e Veriut dhe shoqëria e Maqedonisë të tregojnë rezultate në ndërmjetësim si në të kaluarën dhe, siç tha “ne do të jemi më të mirët nga vendet më të mira në Evropë në aplikimin e ndërmjetësimit”.
“Dyzet e gjashtë ndërmjetës për katër vjet janë tashmë në rrugë për të arritur katër mijë rastet e ndërmjetësimit. Mund të them se me fillimin e kësaj fushate vetëm do të rrisim numrin dhe në interes të shoqërisë maqedonase, para së gjithash të komunitetit të biznesit nga sektori publik dhe privat, si dhe nga fusha të tjera, do të arrijmë në fakt shoqëria maqedonase të jetë më pak konfliktuale dhe lëndët, gjegjësisht mosmarrëveshjet të zgjidhen në këtë mënyrë, tha Mlladenovski.
