Më 12 shtator të vitit 2001, NATO aktivizoi artikullin 5 për herë të parë në histori. “Një sulm i armatosur ndaj njërit, konsiderohet një sulm ndaj të gjithëve”. Për Joe Biden, ky artikull është një detyrim i shenjtë.
Presidenti amerikan është në Bruksel dhe planifikon të rikonfirmojë atë përkushtim gjatë samitit të NATO-s që mbledh bashkë liderët e 30 shteteve aleate. Shtëpia e Bardhë nxori pritshmëritë duke u fokusuar në çështje si vetë NATO, korniza e organizatës, financimi, fuqizimi i partneritetit, siguria kibernetike dhe ndryshimet klimatike.
Tërheqja ushtarake nga Afganistani do të jetë pjesë e diskutimeve bashkë me strategjinë ndaj Kinës dhe Rusisë. Kjo e fundit do të zhvendoset dhe në Gjenevë të mërkurën, ku po përgatitet takimi i parë i Biden me presidentin rus, Vladimir Putin.
“Ne po kërkojmë të zgjidhim ato veprime që mendojmë se nuk janë në përputhje me normën ndërkombëtare”, tha Biden para takimit.
Në SHBA, aleatët e Biden mendojnë se gjërat janë shumë ndryshe nga periudha kur në krye të Shtëpisë së Bardhë ishte Donald Trump. “Do të shohim një president shumë ndryshe nga ai që ishte nën mëshirën e Putin”, tha kryetarja e Dhomës së Përfaqësuesve, Nancy Pelosi. “Nëse Rusia vijon me veprimet agresive dhe të pamatura, ne do të përgjigjemi me forcë”, theksoi Sekretari Amerikan i Shtetit, Anthony Blinken.
Të dy samitet i japin Biden mundësi unike për të fuqizuar partneritetin global dhe të rivendosë rolin amerikan në skenën botërore. /A2
