Tetovë, 20 janar – Aktivistët e organizatës joqeveritare Multikultura në Tetovë sot së bashku me përfaqësuesit e komunës dhe kryetarin e komunës kanë shpërndarë thasë për mbeturina në “Tregun e grave” me qëllim të vetëdijesimit për ruajtjen e pastërtisë në atë vend, veçanërisht në ditën e pazarit. Drejtimi i aktiviteteve të tilla është që të ketë rrugë dhe trotuare të pastra, ndërsa pemët dhe perimet e kalbura të grumbullohen në qese.
“Për të kuptuar se prej ku vjen kjo sjellje e pamatur e shitësve, sot aktivistët e Shoqatës Multikultura së bashku me kryetarin e komunës së Tetovës, kryesuesin e NKP Tetovë, udhëheqësin e Sektorit për urbanizëm, veprime komunale dhe mjedis jetësor, i vizituan shitësit në Tregun e grave. Shitësve iu shpërndanë thasë me mesazhe mjedisore me qëllim që të ndërgjegjësohet për mirëmbajtjen e tregut dhe të lehtësohet puna e punëtorëve në NKP Tetovë”, deklaroi Majlinda Iljazi nga Multikultura.
Gjithashtu, u vendos kontejner i madh i improvizuar, ku shitësit mund t’i lënë qeset në fund të ditës së punës.