Uashington, 9 Mars - Greqia kërcënon botën me një krizë të re financiare. Deklarata vjen nga kryeministri grek Jorgos Papandreu pak përpara takimit me kreun e Shtëpisë së Bardhë, Barak Obama. Papandreu tha se borxhi i lartë shtetëror mund të trondisë themelet financiar të ekonomisë botërore. Pritet që në takimin me presidentin amerikan, kreu i qeverisë greke t’u bëjë thirrje vendeve europiane dhe Shteteve të Bashkuara që të veprojnë së bashku kundër spekuluesve, të cilët sipas tij, po bëjnë që kostoja e huave që merr Greqia të arrijë nivele të paqëndrueshme. Papandreu tha se SHBA-ja duhet të ketë interes në stabilitetin e Evropës si patneri më i madh tregtar i saj. Një ditë më parë, kryeministri grek u takua me sekretaren amerikane të shtetit, Hilari Klinton e cila shprehu mbështetjen e shba-ve, në përpjekjet e Greqisë për kthimin e ekonomisë në binarë nëpërmjet masave drastike të paraqitura nga qeveria.

Propozimi i BE-së: Një FMN për europën

Bruksel, 8 mars - Në një kohë që Greqia ka kthyer sytë nga Shtetet e Bashkuara për të dalë nga kriza, Brukseli del me një propozim që ka marrë miratimet e para; një Fond Monetar Europian që do të ndihmojë vendet e Eurozonës. Komisioni Europian është gati për ngritjen e një institucioni të tillë me qëllim ruajtjen e qëndrueshmërisë së monedhës së përbashkët europiane. Lajmi publikohet nga mediat e huaja si Fajnenshëll Tajms apo NYT sipas së cilave, Franca dhe Gjermania po përgatisin një plan të ri për fuqizimin financiar, me qëllimin që ajo që po ndodh me Greqinë, të mos përsëritet në të ardhmen. Autoritetet gjermane thonë se qëllimi nuk është krijimi i një konkurrenti të FMN-së, por sigurimi i një ekuilibri në eurozonë. Kancelarja gjermane angela merkel dha mbështetjen e saj të plotë për një organizëm të tillë, e kjo mbështetje nuk do të lëkundet edhe në rast se do të kërkohen ndryshime në traktatin e Bashkimit Europian. Mediat shkruajnë se Fondi Monetar Europian do të kushtëzojë ndihmën e do penalizojë ashpër vendet që dështojnë në përpjekjet për të ulur deficitin buxhetor si pezullimi i se drejtes se votes ne takimet ministrore te BE-se apo fondet nga buxheti I përbashkët. Fondi monetar ndërkombëtar u krijua në vitin 1944 dhe kishte për synim të ndalonte vendet që përfshiheshin nga kriza të ktheheshin në diktatura aggressive, ashtu sic ndodhi me gjermaninë.