Prishtinë, 10 mars - Të tmerruar nga lëkundjet e tokës të shkallës 5.2 shkallë, sipas Richterit, ka bërë qytetarët të lënë banesat dhe shtëpitë e tyre dhe të dalin përjashta. Ata e kanë duruar të ftohtit për të qëndruar për një kohë në hapësirë të hapur. Trotuaret e rrugëve të Prishtinës janë mbushur me njerëz që dilnin me shpejtësi nga brendia e ndërtesave, në të cilat është hetuar dridhja. Kanë qenë të shpeshta skenat kur personave që përpiqeshin të thërrisnin në telefon të afërmit e tyre, për të mësuar nëse kishin pësuar. Për t’i bërë më të rënda këto skena, për një kohë pas dridhjes që ndodhi në ora 14:39, nuk ka funksionuar rrjeti telefonik i operatorit “Vala”. Për të parandaluar ndonjë katastrofë të mundshme, drejtuesit e shkollave e kanë ndërprerë procesin mësimor.

Zyra për Sizmologji, e cila vepron në kuadër të Ministrisë së Energjisë dhe Minierave të Kosovës, ka njoftuar se epiqendra e këtij tërmeti ka qenë në Rrafshin e Dukagjinit, diku afër qytetit të Pejës dhe të Istogut.

Zëvendësdrejtori i Entit Sizmik të Serbisë, Branko Dragiçeviq, ka thënë për radion “B92”, se epiqendra e tërmetit ka qenë në rajonin e Zubin-Potokut, 15 kilometra në veriperëndim të Mitrovicës. Në të njëjtën kohë ka pasur tërmete edhe në Greqi dhe Itali, kurse tërmeti me fuqinë më të madhe mendohet se e ka goditur Greqinë.

Ditë më parë, Instituti Sizmik i Serbisë paralajmëroi se mund të ketë tërmet edhe në Kosovë.

Tash është vërtetuar ky supozim edhe kosovarët kanë nisur të jetojnë me frikën se mund të ndodhë ndonjë katastrofë. Të mërkurën mbrëma ata kanë rënë të flejnë duke u lutur që të mos ketë ndonjë tërmet që do të shkatërronte ndërtesat, ose në rastin më mirë në këso situatash, të mos ketë nevojë të qëndrojnë përjashta në një natë me borë dhe acar.

Ndërkohë është mësuar se muret e Stacionit të Policisë në jug të Mitrovicës dhe dy shtëpi në fshatin Trepçë, janë çarë si pasojë e tërmetit. Komandanti i këtij stacioni policor, kapiteni Bashkim Spahiu, ka thënë se si pasojë e dridhjes së tokës, objekti që është shfrytëzuar si stacion policie në jug, ka pësuar dëme të dukshme. Edhe dy shtëpi të vjetra në fshatin Trepçë kanë pësuar çarje në mure. Njëra prej tyre, ku kishin qenë duke jetuar katër familje, ishte boshatisur nga banorët, ndërsa në tjetrën, e cila ishte dëmtuar më pak, banorët vazhdonin të qëndronin në të. Tash për tash, nuk ka të dhëna për dëme të tjera në këtë komunë.