Prishtinë, 10 mars - Vendet e Quintit – Franca, Gjermania, Italia, Mbretëria e Bashkuar dhe SHBA, të mërkurën mbrëma, e kanë lëshuar një deklaratë, ku thuhet se nuk i është prezantuar kryeministrit, qoftë kolektivisht apo individualisht, dëshmi apo të dhëna të inteligjencës lidhur me veprimet e supozuara korruptive të anëtarëve të Qeverisë së Kosovës dhe as ka kërkuar ndërrime në Qeverinë e tij. Shtetet e Quintit konsiderojnë se kjo është përgjegjësi e kryeministrit dhe partnerëve të tij të koalicionit. “Shtetet e Quintit ripohojnë përkushtimin e tyre për të bashkëpunuar me Qeverinë e zgjedhur të Kosovës për të avancuar interesat e shtetit dhe për të shtyrë përpara qeverisjen e mire”, thuhet në deklaratë.

Gazeta “Koha ditore” ka raportuar, se në kuadër të luftës kundër korrupsionit, përfaqësues të bashkësisë ndërkombëtare i kanë kërkuar kryeministrit të Kosovës, Hashim Thaçi që të largojë një ministër të kabinetit të tij, ngase ka dëshmi të shumta për keqpërdorim të postit. Sipas burimeve të kësaj gazete, faktori ndërkombëtar ka kërkuar nga kryeministri Thaçi shkarkimin e njërit ministër. Dosja, që kryeministrit Thaçi i është treguar nga shërbimi inteligjent i njërit shtet anëtar të Quintit, thuhet se përmban të dhëna të mjaftueshme për të argumentuar dhjetëra milionë euro keqpërdorime të ministrit në fjalë.

Ditë më parë, shefi i Zyrës Civile Ndërkombëtare (ICO) në Kosovë, Pieter Feith, në një intervistë për agjencinë e lajmeve “Reuters”, ka thënë se Kosova nuk mund t’i afrohet Bashkimit Evropian pa luftuar dhe pa zhdukur të keqen e krimit të organizuar dhe korrupsionit.

Edhe zyrtarë të misionit evropian të sundimit të ligjit në Kosovë, EULEX, patën paralajmëruar se do të arrestohen “peshq të mëdhenj” të përfshirë në korrupsion dhe krim të organizuar.