Prishtinë, 10 mars - Raportet e ngrira midis KFOR-it dhe institucioneve të Kosovës janë normalizuar të mërkurën. Takimi i presidentit Fatmir Sejdiu dhe kryeministrit Hashim Thaçi me komandantin e KFOR-it, Markus Bentler, ka rezultuar me vazhdimin e bashkëpunimit ndërmjet NATO-s dhe Forcës së Sigurisë së Kosovës (FSK). Nëpërmjet komunikatave për media të lëshuar nga Presidenca e Kosovës dhe nga KFOR-, bëhet e ditur se do të vazhdojë në të ardhmen angazhimi i përbashkët për ngritjen e FSK-së. “Pas pezullimit të mbështetjes së KFOR-it për Forcën e Sigurisë së Kosovës më 5 mars, presidenti dhe kryeministri kanë punuar me komandantin e KFOR-it që t’i zgjidhin në mënyrë të kënaqshme çështjet në fjalë. Kjo ka rezultuar në një marrëveshje të re e cila ka të bëjë me mënyrën e përdorimit të njësisë ceremoniale të FSK-së, e cila do të vazhdojë t’i përdorë armët e demilitarizuara, me pajtimin e komandantit të KFOR-it, dhe rikonfirmon se FSK-ja nuk do të ketë rol mbrojtës apo ushtarak meqë kjo detyrë është e ndërmarr nga KFOR-i”,  thuhet në deklaratën e KFOR-it.

Zyra e presidentit të Kosovës ka bërë të ditur se në këtë takim është arritur dakordimi për vazhdimin e bashkëpunimin. Më tej në deklaratë, institucionet e Republikës së Kosovës theksojnë nevojën e bashkërendimit me KFOR-in, në rastet e paraqitjes publike të Gardës Ceremoniale, ndërkaq mirëpresin mbështetjen e KFOR-it për FSK-në, ndërsa ato ruajnë dhe aplikojnë parimet e respektit të ndërsjellët, bashkëpunimit të afërt dhe transparencës së plotë.

Raportet mes FSK-së dhe KFOR-it u ftohën më 5 mars, në ceremoninë përkujtimore me rastin e fillimit të “Epopesë së UÇK-së”, kur Garda Ceremoniale e FSK-së u paraqit me armë zjarri për të nderuar 12 vjetorin e rënies së komandantit legjendar Adem Jashari dhe familjen Jashari. Kjo gjë për KFOR-in është konsideruar si e papranueshme dhe shkelje e marrëveshjes që në raste të tilla, FSK-ja të mos paraqitet në mënyrë ushtarak.