Shkup, 9 mars- Me thirrje kundër Qeverisë, duke hedhur vezë mbi të dhe parulla “Edhe ne kemi të drejtë për jetë”, “Prilepi qytet i të falimentuarve dhe tepricës teknologjike”, disa qindra punëtorë të falimentuar nga mbarë Maqedonia sot sërish protestuan para Qeverisë.
Nga Qeveria askush nuk i priti protestuesit, andaj për të martën e ardhshme paralajmëruan protesta masovike. Në ndihmë e thirrën edhe bashkësinë ndërkombëtare, të gjitha partitë politike dhe qytetarët të cilët i mbështesin bashkë të dalin para Qeverisë, me qëllim që të zgjidhet çështja e tyre.
“Ne nuk kërkojmë të hyjmë brenda, meqë të martën e kaluar i dhamë listë me kërkesa kryeministrit dhe presim që të na thërrasin”, deklaroi Liliana Georgievska, kryetare e Trupit koordinues të punëtorëve të falimentuar nga Kumanova.
Ata presin nga kryeministri, megjithatë të lëshojë pe dhe të gjejë para nga buxheti për zgjidhjen  e problemit të tyre.
“Ne kemi dhënë disa oferta që i punonin shoqatat e falimentuara bashkë me sindikatën. Presim që kryeministri, megjithatë, të lëshojë pe dhe të gjejë para nga buxheti dhe të zgjidhë problemin e punëtorëve të falimentuar të cilët luftojnë për ekzistencë”, deklaroi Dragi Jovanovski nga LSM-ja, duke kërkuar që që problemi të zgjidhet sipas direktivave evropiane.
“Nëse eventualisht sërish marrim përgjigje negative do të kërkojmë ndihmë nga partitë tjera politike, ndërsa një pjesë e punëtorëve të falimentuar do të kërkojnë edhe azil ekonomik në vendet evropiane”, shprehet Jovanovski.
Në protestën janë të pranishëm edhe përfaqësuesit e një pjese të partive opozitare.
“Habitemi me të gjitha qeveritë dhe partitë politikë që në llogari të të falimentuarve tentojnë të marrin pika politike”, deklaroi Nikolla Nikollov, i falimentuar nga Shtipi.
Punëtorët e falimentuar, të cilët si tepricë teknologjike mbetën pa punë kërkojnë që personat të cilët kanë mbi 15 vjet stazh pune dhe moshë mbi 53 vjeçe për burra dhe 50 vjeç për gra të marrin nga 100 euro në muaj apo t`u lejohet pensionim i parakohshëm.