Shkup, 10 mars - Demokracia e Re (DR) nëpërmjet një kumtese për media, ka reaguar ndaj deklaratës së kryetarit të Komitetit për marrëdhënie ndëretnike, deputeti i BDI-së, Xhevat Ademi. “Z. Ademi, ju jeni Kryetar i Komitetit për marrëdhënie ndëretnike. Komiteti ka shtatë anëtarë shqiptarë, shtatë maqedonas, një turk, një boshnjak, një vlleh, një rom dhe një serb. Komiteti, sipas Kushtetutës dhe ligjit, merr vendime me shumicë të thjeshtë dhe Ju këtë shumë mirë e dini. Komiteti është peng i mosardhjes së deputetëve të mazhorancës parlamentare ku edhe ju bëni pjesë. Nuk e kuptojmë se si sipas logjikës Suaj kjo situatë na konvenon neve shqiptarëve të lejojmë që të majorizohemi para se të fillojnë seancat me mosardhjen e deputetëve të shumicës parlamentare. Bojkoti aktual, z.Ademi, është majorizimi që Ju po e përmendni”. Në kumtesë thuhet se DR-ja nuk e kupton pse pranohet kjo iniciativë e kësaj partie opozitare. “Jeni shndërruar në vegël të VMRO-DPMNE-së”, thuhet në reagimin e DR-së.

Ditë më parë deputeti Xhevat Ademi deklaroi se propozimi i DR-së që Komiteti të punojë me shumicë të thjeshtë, nuk është në pajtueshmëri me zgjidhjet e tashme ligjore, zgjidhje e cila kërkon shumicë me dy të tretat e deputetëve sepse Komiteti është instrument për tu mbrojtur nga majorizimi. Sipas tij propozimi i ofruar e favorizon majorizimin. Ky reagim vijoi pasi që dje DR-ja deri te Parlamenti i Maqedonisë parashtroi ndryshime dhe plotësime për Ligjin e Komiteti për marrëdhënie ndëretnike, pasi që i njëjti Komiteti për të katërtën herë me radhë nuk e mbajti mbledhjen e paraparë për shkak mungese të kuorumit.