Shkup, 19 qershor - Një person e humbi jetën dhe një është lënduar në një aksident rrugor që ka ndodhur mbrëmë në autostradën Veles - Shkup në tunelin "Katllanovë".

Aksidenti ka ndodhur rreth orës 23 e 30 minuta kur automjeti i tipit "Audi A2" me targa të Shtipit, i drejtuar nga 20-vjeçari T.M. është përplasur në një automjet transportues "Fap Famos" me targa të Shkupit, të cilin e drejtonte 24-vjeçari A.Z.

Nga lëndimet e marra në vendin e ngjarjes ka vdekur shoqëruesja në automjetin e 20-vjeçarit Sonja A. nga fshati Kuklish në Strumicë, ndërsa  lëndime të lehta ka marrë shoferi i automjetit transportues. Të lënduarit i është dhënë ndihmë mjekësore në Qendrën mjekësore në Veles.

Ekspertizë në vendin e ngjarjes kanë kryer një ekip nga SPB-Veles, gjykatësi hetues dhe prokurori publik, pas urdhrit të të cilit trupi i së ndjerës është dorëzuar në autopsi.