“Toro” vjen me ekspozitën “in exces” në Hamburg
kulture
“Toro” vjen me ekspozitën “in exces” në Hamburg

“Toro” vjen me ekspozitën “in exces” në Hamburg

"In excess" titullohet ekspozita e radhës e artistit nga Prishtina, me vendëqëndrim në Hamburg të Gjermanisë, Mentor A.Ejupi Toro. Ajo do të hapet në galerinë PopArt Store në qendrën tregtare të Edeka nord – Marktkauf-Center Hamburg më 27 mars 2019.

Literatura dhe piktura kanë qenë gjithmonë shtytje për njëra-tjetrën, janë bërë shumë shkrime për temat e marra nga pikturat e ndryshme, po ashtu janë bërë dhe bëhen akoma shumë piktura të bazuara në ngjarjet e librave nga mjeshtrit e literaturës.

Autori i mirënjohur, Charles Bukowsky, ishte ai i që e shtyu piktorin të merret me ilustrimin apo pikturimin e jetës dhe veprës së autorit autobiografik. “Gjatë vitit të kaluar, derisa po udhëtoja në metronë e metropolit tim, po lexoja gazetën“Zeit“ dhe hasa në një shkrim të mrekullueshëm. Ishte letërkëmbimi mes Charles Bukowsky dhe Henry Miller. Isha aq i koncentruar në leximin e letrës, saqë kisha kaluar stacionin ku do zbrisja, më dukej vetja se jam në një dhomë në New York dhe po lexoja letrën që më kishte dërguar Charles…“ – shprehet Toro në prezantimin e motivacionit dhe konceptit të kësaj ekspozite.

Pikturat gjigante të formatit si „Charles in New York“ që është 200 x 300 cm e punuar në kanavacë të bën të ndjehesh i vogël si njeri pranë kësaj pune, duke reflektuar një rrëmujë metropolitane, një kaos nga jeta e bujshme e natës, por me një kompozicion dhe një perspektivë maestrale, për të dalë në pah „varshmëria“ e Bukowskit ndaj alkoolit dhe epshit erotik. Por, me një abstraksion „konkret“ dallohet dora e zgjatur me një shishe verë në dorë dhe shumë figura femrash që janë të kompozuara me një dinamikë suksesive, që e bën të dallohet puna e Toros ndër vite nga artistët të tjerë.

Tek punimi “Charles with A.“ kemi një format vertikal 140 x 200 cm i punuar me vaj në kanavace, ku përveç portretit të fshehur të Charles Bukowsky-t, kemi një prerje fytyre femre, e cila me një epsh shkrihet mbi portretin e fshehur, duke dhënë një perspektivë dhe një mashtrim optik të një thellësie të mbyllur në të kaltrën e qiellit. Dekonstruimi i figuratives në këtë abstraksion që përmban shumë simbole erotike, të mban në një situatë transi meditativ të një momenti nga letrat e Bukowskit drejtuar Henry Millerit.

Në ekspozitë do të jenë 10 piktura të formateve gjigante, të cilat do të shpalosen për publikun artdashës në Hamburg në fund të marsit./albinfo.ch

 

Vernissage : 27 mars 2019 në ora 18:00

Marktkauf – Center Hamburg – Seeveplatz 1 – 21073 Hamburg

Per detaje të tjera ju informojmë pas presseconference të hënën, më 22 mars.

Me respekt,

Kunstverein G.T.H. e.V. Hamburg

09.03.2019

Hamburg

© ZHURNAL 10.03.2019, 09:39 | L.E. | 659 I LEXUAR
"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.mk, do të thotë se pranoni kushtet për kopjim, të cilat janë publikuar KËTU."