Institucionet përgënjeshtrojnë Valmir Azirin dhe Ministrinë e Kulturës
maqedonia
Institucionet përgënjeshtrojnë Valmir Azirin dhe Ministrinë e Kulturës

Institucionet përgënjeshtrojnë Valmir Azirin dhe Ministrinë e Kulturës

Shkup, 23 shkurt - Komisioni i shkallës së dytë përgënjeshtroi Sekretarin Shtetërorë të Ministrisë së Kulturës Valmir Azirin, i cili një ditë më parë i tha Televizionit Alsat se projektet për të cilat dyshohet se kanë të bëjnë me nepotizëm dhe konflikt të interesit, po shqyrtohen nga komisioni qeveritarë. Nga Komisioni i shkallës së dytë thonë se nga projektuesit ende nuk ka arritur asnjë ankesë për rishqyrtim të projekteve të dyshimta, transmeton Alsat-M, shkruan Zhurnal.

Nga Qeveria bëjnë me dije se projektuesit kanë të drejtë që të kërkojnë rishqyrtim nga Komisioni i shkallës së dytë në afat prej 15 ditësh nga dita e refuzimit apo tërheqjes së projektit.

Kërkesën e Ministrit Robert Allagjozovski për përfshirje të Prokurorisë Publike dhe Komisionit Anti-korrupsion në zbardhjen e plotë të parregullsive eventuale në ndarjen e fondeve, nuk e komentojnë institucionet në fjalë.

Inspektorati i brendshëm i ministrisë tha se nuk është përgjegjës për vendimet e komisioneve të po kësaj ministrie. Nga ana tjetër revizioni i brendshëm i Kulturës heshtë. Ministria e Kulturës gjithashtu nuk jep informata nëse ndonjë organ i brendshëm ka bërë analizë në vendimet e komisioneve për ndarjen e fondeve të projekteve ku dyshohet se ka pasur nepotizëm dhe konflikt të interesit. Të pakapshëm janë edhe anëtarët e komisioneve të brendshme gjegjëse të cilët nuk pranojnë assesi të prononcohen në lidhje me procedurat e kalimit të projekteve. Alsat mëson se kjo heshtje vjen pas vendimit të udhëheqësve të Ministrisë së Kulturës, që asnjë nga anëtarët e komisioneve të mos prononcohet deri në qartësimin e gjërave.

Në lidhje me skandalet e keqpërdorimit të fondeve, nepotizmit dhe konfliktit të interesit gjatë miratimit të projekteve kulturore shqiptare, kanë reaguar edhe partitë politike. Më të zëshmet kundër kësaj dukurie ishin VMRO-DPMNE-ja dhe Aleanca për Shqiptarët. Të dy subjektet kërkonin tërheqje të plotë të programit, të cilin ata e quanin “Skandaloz”.

© ZHURNAL 23.02.2018, 15:37 | D.J. | 4,790 I LEXUAR
"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.mk, do të thotë se pranoni kushtet për kopjim, të cilat janë publikuar KËTU."