ANALIZË Zoti Zaev mileti do mirëqenje sociale e jo “ajrosje” të Qeverisë
maqedonia
Analizë Zoti Zaev mileti do mirëqenje sociale e jo “ajrosje” të Qeverisë

Analizë Zoti Zaev mileti do mirëqenje sociale e jo “ajrosje” të Qeverisë

Shkup, 22 shkurt - Kryeministri Zaev në intervistën e tij të fundit për BIRN- Maqedoni, ka paralajmëruar se “ajrosja” e parë e kabinetit qeveritar do të ndodhë në pranverë, pasi që qeveria të mbushë dhjetë muaj. Nuk përjashton mundësinë që të ketë edhe rikonstruim, respektivisht ndërrim të ministrave.

Opinionisti Bujar Idrizi thotë se atë që e presin qytetarët është përmirësimi i gjendjes së përgjithshme e cila vazhdon të jetë e rëndë.

“Atë që e presin qytetarët është përmirësimi i gjendjes së përgjithshme e cila vazhdon të jetë e rënd. Në planin ndërkombëtar, qeveria aktuale për momentin dërgon sinjale pozitive dhe të shpresojmë se kjo do rezultojë me aderim të Maqedonisë në NATO. Në planin e brendshëm, qeveria aktuale ka trashëguar një gjendje të rëndë e cila nuk mund të zgjidhet me shkop magjik. Sipas meje sfida më e madhe e kësaj qeverie, përveç temave veç më të njohurë për opinionin do të jetë  - si t'i mbajë qytetarët e vet në vend”, vlerësoi për Zhurnal, Bujar Idrizi, opinionist.

Nga ana tjetër, gazetari dhe opinionisti Naim Sinani theksoi se sipas të gjitha gjasave në pranverë në qeveri do të përfshihet të pakëtën edhe një apo dy parti shqiptare.

“Këtë e nënkupton paralajmërimi i kryeminsitrit Zoran Zaev për freskim të qeverisë, pasi jemi dëshmitart se pa rritjen e numrit të shumicës parlamentare, qeveria aktuale shumëherë e ka të vështirë të sigurojë edhe kuorumin për punë. Dhe gjykuar sipas prononcimeve partiake, më shumë disponim për tu bërë pjesë e qeverisë shihet te BESA e Afrim Gashit dhe PDSH, por gjithsesi kjo mvaret nga hapsira që këtyre partive do tu krijojnë partnerët aktual të koalicionit LSDM dhe BDI, pasi këto parti përveç përfshirjes me kuadrot e tyre mesiguri do të insistojnë të kenë ndikimin e tyre edhe në politikat qeveritare”, theksoi për Zhurnal, Naim Sinani, gazetar dhe opinionist.

Sipas tij, pranvera nuk është larg prandaj shumë shpejtë do të shihet se cila nga partitë opozitare do ti zënë vendet e Aleancës për Shqiptarët në Qeveri, pas kalimit të kësaj partie në opozitë.

Ndërkaq, analisti Blerim Hyseni vlerëson se rikomponim të qeverise mund të ketë po ky proces nuk mendoj që do ndodh në pranverë kur pritet edhe intensifikim i procesit te bisedimeve me Greqinë ose thënë ndryshe nuk mendoj se do të jetë një veprim i mençur të ndërmeret një hap i tillë.

“Është mirë të bëhet rikomponim sepse tanimë mund të ketë edhe vleresime se cili funksionar ka kapacitet për te udheheq me detyrën e ngarkuar e cili ka ngec në këtë drejtim. Nuk përjashtohet mundësia edhe për rifreskim me partner të ri në veçanti tani pas perçarjes së Lëvizjes Besa e që shkas sipas tyre ka qenë mospjesëmarrja në qeveri. Tanimë "tabutë" u shkrinë dhe lufta për pushtet është më e qartë dhe më e hapur”, thotë për Zhurnal, Blerim Hyseni, analist.

© ZHURNAL 22.02.2018, 17:00 | D.J. | 4,045 I LEXUAR
"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.mk, do të thotë se pranoni kushtet për kopjim, të cilat janë publikuar KËTU."