ANALISTËT Zaev me retorikë "neutralizon" zërat kritik
maqedonia
Analistët Zaev me retorikë "neutralizon" zërat kritik

Analistët Zaev me retorikë "neutralizon" zërat kritik

Shkup, 23 janar - Mendimi kritik në një shoqëri është si pasqyrë ku shihet realiteti në të cilin ajo jeton. Një ndër standardet shtyllë të një shoqërie qytetare është përballimi dhe nxitja e debatit për çështje të ndjeshme e kundërthënëse, shkruan Zhurnal.

Në Maqedoni është krijuar bindja se që kur erdhi Qeveria e re në krye me Kryeministrin Zoran Zaev, është zhdukur masa kritike në shoqëri. Analistët si shkak veçojnë mungesën e kulturës dhe vullnetit për të krijuar masë kritike që tanimë është bërë traditë.

Politologu Xhenis Sulimani shprehet se vullneti i intelektualëve është afrimi me pushtetin sesa krijimi i ndonjë mase kritike. Ai shprehet se në qeverisjen e kaluar nuk ka pasur më shumë masë kritike sesa tani.

Sipas tij tragjedia e kësaj është se me ndërrimin e pushtetit po ndërrohet edhe masa kritike.  Sulimani madje thotë se është krijuar përshtypja se në shoqërinë tonë nuk kemi intelektual të pavarur, por vetëm marioneta që janë në shërbim të qendrave të fuqive.

“Mungesa e kulturës politike, mungesa vullnetit për të krijuar masë kritike tashmë është bërë traditë në këto anë. Pavarësisht kush është në Qeveri, vullneti i intelektualëve është gjithmonë afrimi me pushtetin sesa krijimi i një mase kritike. Unë nuk mendoj që në qeverisjen e Gruevskit ka pasur më shumë masë kritike, ashtu siç po e parashtroni në pyetje. Sipas meje, atmosfera në “masën kritike” ka qenë e njëjtë. Tragjedia e kësaj është se me ndërrimin e pushtetit po ndërrohet edhe masa kritike. Dhe, në këtë mënyrë po krijohet përshtypje se ne nuk kemi intelektual të pavarur por vetëm individë marioneta të qendrave të fuqive, të cilët në thelb nuk kanë interesin e përgjithshëm, por avancimin personal. Nuk ka qeverisje të përkryer. Por, mediat dhe intelektualët nuk duhet t’u japin luksin asnjë qeverie që të ndihet komode dhe superior. Gjithmonë ka diçka për t’u përmirësuar, gjithmonë ka diçka për të cilën duhet debat shoqëror, duhet kritikë...”, ka deklaruar për Zhurnal, politologu Xhenis Sulimani.

Nga ana tjetër analisti politik Alajdin Demiri për Zhurnal shprehet se Zoran Zaev në mënyrë mjeshtërore ka suprimuar masën kritike dhe ka çbërë mendimin kritik. Sipas tij retorika e tij dhe jo punët, kanë suprimuar masën kritike.

“Retorika e Zaevit, jo punët por vetëm retorika e Zaevit e suprimoi masën kritike dhe mendimin kritik në tentimet e veta fluide. Në këtë drejtim, ajo retorikë e mbanë të suprimuar masën kritike dhe e çbën mendimin kritik. Çdo gjë tjetër e hudhë në opozitë dhe kjo është mjeshtria e vet Zaevit, asgjë tjetër nuk ka”, ka deklaruar për Zhurnal, analisti politik Alajdin Demiri.

Është shumë e nevojshme kritika dhe shprehja e lirë e mendimit nga intelektualë dhe njerëz profesional të lëmive të ndryshme, sepse duke ngritur zërin sa më lartë kundër keqpërdorimeve, shoqërisë civile i ruhen vlerat dhe mbrohen interesat e tyre. Në këtë drejtim, rëndësi të veçantë ka edhe mendimi ndryshe nga alternativa tjetër e pushtetit – opozita!

Vendi ynë ka nevojë për territor të fjalës së lirë, ku mendimi kritik nuk është stigmë dhe ku kundërargumentimi bëhet pjesë e kurrikulave shkollore.

Kjo qasje është një alarm për shoqërin, e cila e ka vetëm një mundësi, të lejojë zhvillimin e mendimit kritik në përgjithësi, ose ta ndërtojë një kalifat të ri, ku banorët e tij i binden të parit e refuzuesit ikin në amshim, por kjo e fundit i përketë autoritarizmit e jo demokracisë dhe fjalës së lirë.

© ZHURNAL 23.01.2018, 10:55 | Xh.I. | 2,676 I LEXUAR
"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.mk, do të thotë se pranoni kushtet për kopjim, të cilat janë publikuar KËTU."