Në Moskë nesër do të mbahet Konferenca për paqe në Afganistan
bota
Në Moskë nesër do të mbahet Konferenca për paqe në Afganistan

Në Moskë nesër do të mbahet Konferenca për paqe në Afganistan

Konferenca e paqes e cila nesër do të mbahet në Moskë, do të bëjë bashkë për herë të parë në bisedime të drejtpërdrejta qeverinë afgane dhe lëvizjen talebane, raporton Anadolu Agency (AA).

Ministria e Jashtme ruse ka konfirmuar se gjithçka është gati për fillimin e nesërm të konferencës, që është raundi i dytë i bisedimeve paqësore të organizuara nga Rusia.

Janë ftuar përfaqësues nga 11 shtete, përfshirë Shtetet e Bashkuara të Amerikës (SHBA), Indinë, Iranin, Kinën, Pakistanin, Kazakistanin, Kirgistanin, Taxhikistanin, Turkmenistanin dhe Uzbekistanin.

Arrdhja është konfirmuar nga të gjithë të ftuarit, me përjashtim të SHBA-ve.

Departamenti Amerikan i Shtetit tha se nuk do të ketë përfaqësues, sepse siç tha, raundi i parë i negociatave nuk dha rezultatet e pritura.

Qeveria afgane, nga ana e saj tha se do të dërgojë një delegacion të lartë nga Këshilli Suprem i Paqes ndërsa ardhjen e ka konfirmuar edhe lëvizja talebane.

“Konferenca do të shqyrtojë në mënyrë të detajuar zgjidhjen e krizës në Afganistan dhe një përfundim paqësor të pushtimit të SHBA-ve, për çka delegacioni ynë do të referojë pikëpamjet për mundësitë e arritjes së paqes dhe stabiliteti”, thuhet në një deklaratë të talebanëve.

Edhe ish-presidenti afgan Hamid Karzai ka shprehur vullnetin e tij për të qenë pjesë e konferencës në Moskë duke shtuar se nuk duhet injoruar bisedimet me talebanët.

Zëdhënësi i Qendrës për Hulumtime Bashkëkohore në Afganistan, Omer Nessar, deklaroi për AA se qëllimi i konferencës është legalizimi i procesit të paqes midis qeverisë afgane dhe talebanëve, për të shtuar se shtetet e ftuara, të gjitha kanë një rol të rëndësishëm, pavarësisht faktit se të gjitha janë të përfshira në konfliktet në Afganistan.

Një nga temat kryesore, tha ai, do të jetë tërheqja e të gjitha fuqive të huaja nga Afganistani, sidomos ushtrisë amerikane.

“Në shikim të parë duket një gjë e pamundur, megjithatë po ndryshon dispponimi mbi praninë ushtarake amerikane në Afganistan. Nga njëra anë, ushtria amerikane është në korniza të një marrëveshjeje sigurie, por nga ana tjetër, është e qartë se madje pas 17 vjetësh, ata nuk përmbushën asnjë nga ajo marrëveshje. Parashtrohet pyetja nëse prania e tyre është e justifikuar”, tha Nessar.

Shef i Departamentit për Lindjen e Mesme në Universitetin kombëtar të Kërkimeve në Moskë, Alexey Muraviev tha se tërheqja e forcave të huaja nga Afganistani duhet të shoqërohet bashkë me një rimëkëmbje ekonomike të vendit.

“Aktualisht, prodhimi i drogës është baza e ekonomisë gri në Afganistan. Nëse i qasemi me një seriozitet procesit të paqes, atëherë ai do të duhet të shoqërohet me një plan ekonomik”, tha ai.

Analisti politik Denis Korkodinov është i mendimit se nevojitet heqja e praktikës që të huajt të vendosin udhëheqësit e Afganistanit dhe se vendi do të duhet të drejtohet nga person i cili do të pranohet nga banorët e vendit.

© ZHURNAL 08.11.2018, 17:21 | T.E. | 485 I LEXUAR
"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.mk, do të thotë se pranoni kushtet për kopjim, të cilat janë publikuar KËTU."