ZHURNAL.MK ZHURNAL.KS ZHURNAL.AL
« Analizë » Fondet e BE-së për Maqedoninë, një histori papërgjegjshmërie
« INSIDE » Parkingjet - Komunikacioni akoma mbetet hall i madh i qytetarëve

 

Lajme nga Maqedonia
Shumica parlamentare me këmbë të qelqta, koalicioni pret rritjen të numrave në kuvend
sobranie-na-rm-640x360.jpg

Shkup, 16 janar - Disa herë kemi parë që kryetari i kuvendit, Talat Xhaferi të vendosë në rivotim ligjin, për shkak të mungesës së kuorumit. Një gjë e tillë ndodhi edhe dje.

“Në sallë nuk ka numër të mjaftueshëm të deputetëve, i ftoj deputetët të hyjnë në sallë. E anuloj votimin dhe e rikthej në votim, ftoj deputetët të kthehen në sallë”, tha Talat Xhaferi, kryetar i Kuvendit të RM-së.

Në bazë të Rregullores së Kuvendit, disa ligje sillen edhe me 61 deputetë e për disa të tjera nevojitet vetëm shumica e deputetëve të pranishëm, por gjithësesi duhet që të paktën në sallë të ketë 61 deputetë, dhe kjo pas bojkotimit të punës së kuvendit nga VMRO-DPMNE-ja opozitare, kjo është një sfidë e vërtetë.

Deputeti i LSDM-së, Aleksandër Kiracovski, thotë se shumica parlamentare ka lënë hapësirë për bashkëpunim me të gjitha partitë tjera nga opozita. Kiracovski shpjegon se janë në komunikim të vazhdueshëm me të gjitha partitë parlamentare dhe thotë se mbështetja dhe bashkëpunimi mund të jetë edhe në formë të mbështetjes së realizimit të reformave, pa qenë pjesë e koalicionit qeveritar. Ai shprehet i bindur se do të rritet shumica parlamentare.

“Jam i bindur se në të ardhmen kjo shumicë politike dhe parlamentare do të zgjerohet dhe do të rritet, në interes të qytetarëve të Republikës së Maqedonisë. Ne jemi në komunikim të vazhdueshëm me të gjitha partitë politike dhe lëmë hapësirë për kyçjen e tyre, jo në mënyrë formalo-ligjore dhe zyrtarisht, por të kyçen thelbësisht dhe së bashku të votojmë të gjitha dispozitat pozitive ligjore, që janë në interes të qytetarëve”, tha deputeti i LSDM-së, Kicarovski.

Kjo situatë është përsëritur disa herë këtë vit, pasi që shumica parlamentare që përbëhet nga 49 deputetët e LSDM-së, 10 deputetët e BDI-së, Vesel Memedin nga RDK dhe Çedomir Sozdevskin, si deputet i pavarur, përbëjnë 61 deputetë, por që njëkohësisht do të thotë se për të formuar kuorumin e nevojshëm prej 61 deputetëve, nuk duhet të mungojë asnjë deputet i shumicës. Koordinatori i BDI-së, Ejup Alimi thotë se po që se ka sinjale, partitë e tjera mund të kontribuojnë në çështje të caktuara.

“Programi i qeverisë është tashmë i votuar nga koalicioni qeverisës, tani në rast se ka sinjale nga partitë e tjera të cilat e mbështesin këtë program të qeverisë, ne jemi në Kuvend çdo ditë dhe nuk varet nga ana jonë, por nga ata se kur vijnë dhe kur kontribuojnë për çështje të caktuara për reforma të cilat parashihen në bazë të këtij programi qeverisës”, tha Ejup Alimi, koordinator i grupit të BDI-së.

Kryetari i RDK-së, i cili si deputet hyri në kuadër të koalicionit Aleanca për Shqiptarët, për koalicionin e tanishëm parlamentar thotë se është dhënë mund dhe sakrificë e jashtëzakonshme dhe nuk mund të tolerohet që dikush ta kontestojë këtë.

“Kjo shumicë është stabile dhe dita-ditës do të shtohet dhe do të bëhet edhe më stabile.  Unë besoj se kjo shumicë parlamentare do të shtohet dhe do të jetë edhe më stabile në të ardhmen”, tha Vesel Memedi, deputet i RDK-së.

Pas vendimit të Aleancës për Shqiptarët për t’u larguar nga koalicioni qeveritar, nër opinionin publik janë paraqitur spekulimet për kyçjen e mundshme të PDSH-së dhe Lëvizjes Besa në koalicionit qeverisës. Një gjë të tillë e ka konfirmuar edhe vet kryetari i Lëvizjes Besa, Bilall Kasami në emisionin Klik Plus, ku tha se janë të hapur për një mundësi dhe presin ndonjë ofertë serioze.

Ndryshe si opsion i dytë për koalicionin qeverisës janë deputetët që kanë lëshuar koalicionin për Maqedoni më të mirë, të udhëhequr nga VMRO-DPMNE, e që kanë dalë si të pavarur. Pas deputetit të GROM-it Çedomir Sasdovskit, hapave të tij shkuan edhe  Amdi Bajram nga Lidhja e Romëve dhe Jusuf Hasan nga Partia Demokratike e Turqëve, të cilët në Kuvend paraqiten si të pavarur.

 

"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.mk, do të thotë se pranoni kushtet për kopjim, të cilat janë publikuar KËTU."
 16.01.2018, 20:15  | T.E. | 2,951 i lexuar

 

© ZHURNAL.mk

MARKETINGU    |    IMPRESUM    |    KONTAKT    |    ARKIVA
AGJENCIA E LAJMEVE "ZHURNAL"
Fon: 02 3217 815, E-mail: info @ zhurnal.mk
© 2018 Agjencia e lajmeve "ZHURNAL"
Të gjitha të drejtat e përmbajtjes në këtë portal janë të rezervuara. Ndalohet ribotimi i përmbajtjes (lajmeve dhe të gjitha shkrimeve të tjera) pa lejen me shkrim të portalit "Zhurnal".
Çdo përdorues publik i përmbajtjes sonë pa autorizimin e posaçëm nga "Zhurnal" rrezikon të ballafaqohet me ligjin.
 
<