Liliana Cingu dhe Rexhep Çeliku vlerësohen me dekoratën “Nderi i Kombit”
kulture
Liliana Cingu dhe Rexhep Çeliku vlerësohen me dekoratën “Nderi i Kombit”

Liliana Cingu dhe Rexhep Çeliku vlerësohen me dekoratën “Nderi i Kombit”

Presidenti i Shqipërisë, Ilir Meta vlerësoi me dekoratën “Nderi i Kombit” dy emblemat e jashtëzakonshme të artit dhe kulturës së kombit shqiptar, dy figurat, dy personalitetet që, me pasion, përkushtim, vetëmohim dhe punë të palodhur janë kthyer në simbole mbarëkombëtare: “Perëndeshën e valles” Liliana Cingu, në vlerësim të kontributit të jashtëzakonshëm si soliste me nivel të lartë artistik dhe mjeshtëri të veçantë në interpretimin e valleve shqiptare; për promovimin denjësisht të vlerave të mirëfillta të trashëgimisë sonë kulturore kombëtare brenda dhe jashtë vendit si dhe përçimin e folklorit tonë tek brezat e artistëve të rinj” si dhe “Shqipen fluturuese”, Rexhep Çeliku, në vlerësim të kontributit të jashtëzakonshëm si solist me nivel të lartë dhe mjeshtëri të veçantë artistike në interpretimin e valleve shqiptare; për promovimin denjësisht të vlerave të mirëfillta të trashëgimisë sonë kulturore kombëtare brenda dhe jashtë vendit, si dhe për pasurimin e fondit të krijimtarisë koreografike dhe përçimin e tij tek brezat e artistëve të rinj. Gjatë fjalës së tij drejtuar të pranishmëve, mes të cilëve ishin miq, kolegë e familjarë të dy artistëve, ministrja e Kulturës Mirela Kumbaro, kreu i KLSHsë Bujar Leskaj, deputetë e personalitete të artit e kulturës, presidenti Meta u shpreh se Liljana Cingu dhe Rexhep Çeliku kanë dhënë gjithçka nga jeta e tyre që vallja jonë popullore të duartrokitej e të ngrinte peshë zemrat e te gjithë shqiptarëve, kudo në botë. “Ata ngritën në këmbë dhe pushtuan zemrat e spektatorëve të skenave më të rëndësishme ndërkombëtare duke u njehsuar me vlerat dhe bukurinë e artit, muzikës dhe trashëgimisë sonë, duke u bërë ambasadorë të shkëlqyer të kulturës sonë në botë. Në çdo shfaqje e festival ku kanë marrë pjesë, ata kanë shpalosur me interpretimin e tyre vlerat më të larta të artit koreografik shqiptar”, theksoi Meta. Solistja Cingu duke shprehur mirënjohjen vuri në dukje se puna të bën që ta ndajë këtë vlerësim e t’ua dedikojë koreografëve, pa koreografitë e të cilëve apo perlat e tyre të valleve nuk do të ishte askush në skenë. “I falënderoj të gjithë dhe falënderimi më i madh i shkon kolektivit tonë që është një ansambël e që ka bërë epokë dhe do të vazhdojë të bëjë një epoke në skenat shqiptare dhe më gjerë” tha ajo. Koreografi Rexhep Çeliku, pasi mori në dorëzim dekoratën e lartë nga presidenti vuri në dukje se ky vlerësim ishte shumë i vlefshëm jo vetëm për atë, por për të gjithë kolektivin e ansamblit popullor./SotNews

© ZHURNAL 10.01.2018, 09:38 | Z.H. | 2,443 I LEXUAR
"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.mk, do të thotë se pranoni kushtet për kopjim, të cilat janë publikuar KËTU."